افكار مشاريع جديدة

هل لديك رأس مال و تبحث عن أفكار إبداعية لتستثمر أموالك فيها؟ فرصتك للاطلاع يوميا على كل جديد في عالم المشاريع الصغيرة

دراسات جدوى

المزيد من خطط العمل المختلفة في جميع المجالات ودراسات الجدوى الاقتصادية والدراسات المبدئية ونصائح هامة لكل شركة ناشئة.

الاستيراد والتصدير

اسرار الاستيراد والتصدير ,اعادة التصدير ,الاستيراد من الصين ,نصائح للمستوردين ,شركات الاستيراد والتصدير ,خبايا الاستيراد والتصدير.

التسويق

خاص بطرق التسويق المختلفة ,التسويق الالكتروني ,التسويق بالفايسبوك ,التسويق بالواتساب ,التسويق بالجوال ,نصائح للتسويق.

تنمية بشرية

نصائح مفيدة لتنمية الشخصية والتخطيط الاداري وكل ما يخص التنمية البشرية من دروس ونصائح هامة ومفيدة للمدربين والمتدربين.

الرئيسية » افكار مشاريع جديدة, المشاريع, مشاريع انتاجية, مشاريع صناعية

مشروع تصنيع المنظفات الصناعية (الفنيك)

الكاتب : في 5 مارس, 2013 – 4:48 صتعليقان 2 | 11٬361 مشاهدة

المصنع عبارة عن مخزن معقول المساحة مساحته تقريب 100 متر تحت مبنى سكنى فى أحد القرى مكون من جزئين كما ترى فى الصورة الأولى عبارة عن جزء خارجى يوضع فيه الكراتين والعبوات الفارغة اللتى فى الشكاير كما ترى ويوضع فيه أيضا الكراتين الفارغة والكراتين بعد تعبئتها

مشروع تصنيع الفنيك

مشروع تصنيع الفنيك

 

 

 
المعدات المطلوبة فى مصنع الفنيك :


أولا : يا إما هنعمل خلاطة نضرب فيها كما ذكرتها قبل ذلك فى موضوعى السابق وكده كده إن شاء الله هتكلم عليها تانى بشىء من التفصيل مع رفع صور لها هنا
ثانيا_ ويإما هنضرب فى براميل لإنى لجأت إليها فى الأخر بعد أما الخلاطة الماتور بتاعها اتحرق وكانت عايزة شوية تظبيط من جوة والبراميل هتبقى مجدية للى لسه بادىء فى هذا المشروع هتديله خبرة جامدة فى التصنيع وعن تجربة.

 

يبقى المعدات المطلوبة هى :
1 – براميل صاج مجلفن اللى هى البراميل الفضية أو البراميل العادية اللى بيتعبى فيها فازلين او بتاعة الزيت بتاع العربيات جيب اللى تقدر عليه البرميل بيسع 200كيلو وزيادة شوية قول بتاع 220 كيلو المهم هتجيب نقول مثلا 16برميل ولا حاجة مش هيخسر طبعا هما بيجوا مقفولين بالطبات بتاعتهم بنجبهم من اى بنزينة أو من بتوع غيار الزيت للعربيات او من اللى بيتاجروا فى البراميل والجراكن والعبوات الفارغة بعد اما ياخدوها من المصانع ويغسلوها بيبعوها المهم فيه منهم براميل بتيجى مقفولة بطباتها واحنا بنفتحهم زى براميل زيت العربيات او بنجيب براميل مفتوحة جاهزة بالغطيان بتاعتهم والأفيز بتاعهم زى براميل الفازلين المهم هناخدهم نشطفهم كويس من جوة بماية سخنة او نملاهم ماية ونغليها على النار علشان تسيح المواد الى فيه ونسيبهم فى الشمس علشان لو كان فيهم حاجة من جوة غير الزيت تسيح وتنزل المهم نشطفهم كويس فى الآخر بأى طريقة المهم ينظفوا من جوة وتكلفة البرميل انتا وشطارتك فى السعر سواء جبتهم من بتاع زيت العربيات من بنزينة من اللى بيبيع البراميل والجراكن انا عامة جبتهم ب60 جنيه الواحد وطبعا انتا مش هتجبهم كلهم مفتوحين او لو جبتهم كلهم مقفولين مش هتفتحهم كلهم علشان مش كل البراميل هنفتحها فى الشغل فيه هنفتحه خالص علشان هنضرب فيه زى اللى فى
و فيها برميل مفتوح كان متعبى فيه فازلين بيجى بالغطاء بتاعه وده أفضل براميل اشتغلت فيها وفيه من البراميل اللى هنجيبه مقفول زى ما هو بطباته علشان هنجيب فيه خامات من شركة الكوك

 

2 – هنجيب حنفيات نظيفة بجلب نحاس نجيب مثلا 8 حنفيات بجلبهم النحاس طبعا جلب قلاووظ والحنفيات بتاعتها كذلك علشان يبقى سهل خلعهم وتركيبهم لو باظوا منك او لو احتاجت تغيرهم بعد كده وسعرالحنفية تقريبا 20 جنيه بالجلبه بتاعتها والحنفيات دية هنركبها فى البراميل اللى هنعبى منها ومش شرط نركب ال 8 حنفيات كلهم لإن ممكن نعبى من برملين ولا حاجة وبعدين اما يفضى البرملين نبقى ناخد بالجرادل او بالطرمبة طرمبة رفع الأحماض والزيوت من البراميل المليانة الأخرى اللى من غير حنفيات ونفضى فى البراميل اللى ركبنا فيها الحنفيات بص كل ده يرجع لنظامك فى شغلك والأسهل ليك دية مسائل مش محتاجة كلام المهم البراميل اللى هنركب فيها الحنفيات نلحم الجلب بتاعت الحنفيات الأول فى البراميل عند واحد بتاع لحام ونلحمهم كويس فى البراميل علشان اللحام ميفكش منك بعد كده لحام الجلب بس فى البراميل وبعدين بإدينا نبقى نركب الحنفيات
وفيه نقطة نخلى الحنفيات فى الجزء الأخير فى البرميل يعنى نسيب من الأرض حوالى 25 سنتى تقريبا وبعدين نلحم الجلب او نعمل حنفيتين فى البرميل واحدة على مسافة 25 سنتى من قاع البرميل والثانية على مسافة 3 سنتى من القاع علشان لو حصل فيه ترسيب ولا حاجة فى برميل الفنيك من تحت نتيجة الرطوبة وتغيرات الجو فى الشتاء نتفادى تعبئة الفنيك المرسب تحت أسفل البرميل وغالبا لو حصل فيه ترسيب بيبقى بسيط وده بيبقى أيام الشتاء وده برده نادر لإن احنا الفنيك اللى احنا بنعمله بيبقى متعادل لو قست ال ph بتاعته هتلقيه متعادل وكله ماية واحدة اعلى البرميل زى اسفله لكن لو حصل ترسيب هيبقى فى نهاية البرميل شوية فنيك مرسب طبعا مش بنرميه ولكن بندخله فى شغل جدي او بنعالجه بعد كده بس علشان نتفادى تعبئته وهو مرسب فى العبوات

 
3 – هتشترى طرمبة للبراميل بتاعة أحماض وزيوت علشان تبقى أسهل ليك لما تجى تاخد من البراميل المقفولة اللى هنجيب فيها خامات سواء من الكوك زى زيت الكيروزوت والقطفة طبعا البرميل بيبقى مقفول وفيه طبتين الماكينة الطرمبة هتركب مكان طبة البرميل وتضخ منها زيت الكيروزوت أو القطفة أو الزيت المحمض زى ما هنتكلم بعد كده على الخامات وأماكن شرائها المهم الطرمبة أسهلك فى تفريغ محتويات البرميل بدل اما تقعد تميل البرميل وهو بيبقى تقيل وينكب منك على الأرض فالطرمبة أسهلك
والطرمبة عاملة 70 جنية

هى بتبقى عبارة عن دراع زى ماكينة الخياطة وتقعد تلفه بإيدك يقوم يضخ محتوى البرميل للخارج بدل اما تميل البرميل المهم تكون الطرمبة اللى هتشتريها بتاعة أحماض وزيوت وابقى ركبلها فى الجزء الخارجى لها اللى بيضخ لبرة حتة خرطوم طويل علشان تعرف تعبى فى الجرادل من غير ما يترتش على الأرض زى ما انا عامل فى الصورة التالية

 
4 –  هتجيب بتاع 5 جرادل صاج علشان بنملى فيها الخامات ونوزع منها على البراميل الواحد منها بحوالى 10 جنيه أو اى جرادل حتى لو بلاستيك

 
5 –  هتعملك غلاية شاسية حديد محملة بثلاث عيون او أزيد حسب ما تكلف انتا أهم حاجة تكون الشعل بتاعتها كبيرة والماسورة اللى موصلة بالشعل طويلة علشان خرطوم الأنبوبة يبقى بعيد عن النار وهتجبلك انبوبة اسطوانة كبيرة هتركب غاز براحتك حسب ما هتكلف انتا ولو هتجيب انبوبة زى ما انا عامل هتجيب انبوبة كبيرة طبعا علشان الصغيرة غير مصرح بها
هى تقريبا الغلاية دية اللى باينة عندك فى الصورة كانت مكلفة 300 جنيه واسطوانة الأنبوبة كانت عاملة الواحدة 250 جنيه أهم حاجة الخراطيم بتاعتها تكون محملة كويس وتأمن عليها كويس

 
6 –  هتعوذ حوالى 25 سبت مش هيخسر هتحتاجهم وقت ضغطة الشغل هما بيجابوا من عند الشريف للبلاستيك اسمها سبتة الزبادى علشان هنحط فيهم الأزايز بعد تعبئتها وسعر السبت كان 14 جنية

 
7 – هتجبلك مطرقة حوالى 10 كيلو ولا حاجة حديد يإما تجبها ألمانى يا إما صينى يا إما مصرى المهم تعيش معاك وبعدين نركب لها يد شوم طويلة علشان هنستخدمها فى الدق على برميل فيه مادة جامدة اسمها رجينة بالبلدى وباسم بلدها اللى بتيجى منه اللى هى الصين قلفونية صينى ww المهم كل ده هنبقى نتكلم عليه والمطرقة المصرى عاملة 60 جنيه باليد الشوم بتاعتها تبقى ب 70 جنيه اللى هى بنقول عليها مرزبة

 

8 –  هتحتاجلك جوانتيات أحماض الجوانتيات بتشتريهم من أى شركة مواد إطفاء ومستلزمات الأمن الصناعى الدستة ب 90 جنيه الجوانتى ب 7.5 جنيه

 

9 – لو عايز تجيب وده مش شرط لإن العملية مش معضلة فلو حبيت تشتريلك أفرول تشتغل بيه ماشى خير وبركة ولو حبيت تشتغل فى لبس قديم من عندك اى لبس ماشى علشان متكلفش نفسك
_ وبرده لو حبيت وده برده مش شرط تشتريلك حذاء بوط
لإن العملية مش معضلة زى ما قلتلك ما انتش شغال قدام خلاطة 10 طن ده انتا بتضرب فى براميل ده حتى الخلاطة ال4 طن ودية انا كنت شغال عليها وكنت شغال بلبسى العادى لبس خروج اتوسخ بس وعامة بيطلع مع المساحيق يعنى لو اتعصت من صابونة الفنيك عاديها دلوقتى وبعدين نبقى نشرحها لو اتعصت منها عادى مع المساحيق بتطلع ( خطورة الفنيك أثناء التفاعل بس فى الأول ومش معضل برده طالما انتا مش شغال قدام خلاطة كبيرة 10 طن ولا حاجة زى مصنع فنيك العاشر طيب ده انا كنت واقف فوق الخلاطة ال 4 طن اللى عندنا فوقيها زى ما هبقى اوريلك صورها وشغال فى عز المعمعة زى ما بيقولوا والدخنة طالعة شديدة اثناء التفاعل لإن التفاعل بيطرد الحرارة فى صورة دخان شديد وده طبعا علشان 4 طن وخلاطة فبيحتاج حوالى شكارتين ونصف صودا والصودا فيها حرارة فأثناء التفاعل كانت الحرارة طالعة شديدة من الخلاطة وانا فوق الخلاطة وواخد الدخنة معظمها طالعة علية وعادى يعنى وكملت شغلى على هذا الحال وطبعا مش بقولك اعمل زى لأ ده غلط يعنى لو عندك خلاطة متعملش الغلط اعمل انتا الصح ولو عندك خلاطة لا تقف فوقيها خليك فى الأمان اقف على السلم الثابت للخلاطة لأحسن تتزحلق وتقع فى الخلاطة وتجيب الغلط عليه وانا عايز منك دعوة حلوة مش دعوة تبهدلنى
وطبعا الغلط كان منى مش الغلط انى اقف فوق الخلاطة لإنى انا واخد على كده اما انتا بلاش تقلدنى قلد الصح لأ أقصد ان الغلط كان انى اثناء وضع الصودا فى الخلاطة طبعا بعد ذوبانها جيدا فى برميلين ماية البرميل ال120 كيلو البلاستيك كل شكارة صودا فى برميل مليان ماية وادوبها كويس جدا المفروض انى بحط الصودا سرسوب سرسوب فى الخلاطة علشان التفاعل يتم بشكل سليم لحد اما يتم التفاعل واطمئن ان مفيش حرارة كامنة لسه ممكن تطلع فاجئة تعمل فوران ابقى افضيها خالص الصودا الشوية اللى هيبقوا موجودين فى كل برميل يعنى علشان ميحصلش فوران فى الخلاطة يؤدى إلى ان الصابونة تنكب من الخلاطة تبهدلنا وهى سخنة ملهلبة او تحصل نتايج متضاعفة اكتر من انها تنكب
فكان الغلط منى طبعا انا كنت بحطها سرسوب سرسوب طبعا عن طريق جردل بلاستيك بس خانى التفاعل وفكرت ان التفاعل تم فبقيت احط بالجردل على طول ورا بعضه مرة واحدة من غير ما احط سرسوب سرسوب من الجردل بقيت اكب الجردل مرة واحدة على طول وورا بعض فالحرارة بقت شديدة تانى والدخنة كترت اوى دليل ان لسه فيه حرارة كامنة فكان هيحصل فوران بس الحمد لله لحقناه بخرطوم الماية قبل ما يفور
لكن لما تضرب فى البرميل الأمر بيبقى سهل بس طبعا برده اثناء وضع الصودا فى البرميل علشان التفاعل برده بيبقى وضع الصودا سرسوب سرسوب ومش بالجردل زى الخلاطة لتلاقى البرميل حصل فيه فوران فى ساعتها لأ لما هتشتغل فى البراميل يبقى حقن الصودا بشفشق صغير اللى هو الشفشق البلاستيك اللى بيسع تقريبا كيلو او كيلو ونصف وتحقن سرسوب سرسوب لحد اما الحرارة تهدى ويتم التفاعل ممكن ساعتها تحط باقى الصودا بس برده خليك طالما انتا فى الأول لسه اول مرة هتضرب خليك حطها حفن على طول سرسوب سرسوب على طول
وطبعا هنا مبتبقاش الحرارة اللى طالعة على هيئة دخنة شديدة فى برميل 200 كيلو زى خلاطة 4 طن بتيقى الدخنة مش شديدة والعملية دية ترجع لظبط التفاعل بتاعك وظبط ايدك وانتا بتحط الصودا فى البرميل يكون سرسوب سرسوب زى ما قلنا حقن يعنى تحقن بالصودا
المهم نرجع لموضوعنا هتشترى حذاء بوط بتاع أمن صناعى ماشى وهتشترى أفرول ماشى هتلبس جزمة من عندك عادية ولبس قديم من عندك ماشى
المهم فى كل دول الجوانتى هو اساس الشغل حماية لك

للحذاء البوط أهى وعلى فكرة انا ملبستوش غير 3 مرات فى 3 تضريبات بس وبعدين زهقت منه رميته هو يمكن ينفعك لما تعملك خلاطة 4 طن ولا حاجة وعامة لو بتحب تشتغل على نزاهة ونظافة هاتلك واحد مش هيخسر لإنه مش غالى

 

10-  هتجبلك خراطيم بلاستيك على مقاس الحنفية نصف بوصة أو لو عندك حنفية 3/4 بوصة يبقى خرطوم بلاستيك3/4 بوصة على حسب الحنفية اللى عندك علشان هنحتاج نملى ماية فى البراميل

 

 

11 –  هتشتريلك ميزانة طبلية أو بيسموها حصيرة هتجيب المتوسطة اللى بتقيس لحد 600 كيلو كفاية ومعقولة هتلاقى فيه منها مستعمل وفيه جديد المستعمل عامل 500 جنية والجديد 800 جنيه ده سعرها من 6 شهور كنت سائل عليها لإنى كنت ببيع اللى عندى المهكعة علشان أشترى جديد.
بس الأفضل والأحسن ليك فى الشغل وتحسبلك كمياتك بالضبط انك تشترى الميزانة الديجتال الرقمية أم شاشة رقمية هتريحك فى الشغل جامد وهتحسبلك كمياتك بالضبط لإنها حساسة وبتبدأ وزن من أول 50 جرام وبتوزن لحد 600 كيلو
وهى كانت عاملة 1100 جنيه

 

12 –  هتشتريلك قماع صاج ( قمع يعنى ) من الكبير ده يملى معاك الجمدانات بسرعة وبيستحمل اشتريلك 3 ولا حاجة والقمع الصاج الكبير عامل الواحد 5 جنيه وجبلك برده قمعين صاج ولا 3 من الصغيرين للجراكن والقمع الصغير عامل 2 جنية
وطبعا القماع الصاج اللى اقصدها زى اللى بيتعبا بيها الجاز فى الجراكن شوف بتستحمل ازاى وعملية مع بتوع الجاز احنا بقى عايزينها تعيش معانا برده بس فى الفنيك ولو حبيت تجيب قماع بلاستيك ماشى شغال عادى بس القماع الصاج أرخصلك .
والقماع الصاج اللى أقصدها زى اللى هوريهالك فى الصورة اللى فى الجركن

 

13 –  هتشتريلك 25 جمدانة ولا حاجة وطبعا فيه منها مستعمل وفيه جديد المستعمل ب 19 جنية والجديد ب 23 جنية وفيه سكك أرخص من كده وسواء جبت مستعمل ولا جديد مش فارقة كده كده هتتوسخ من الفنيك وانتا كده كده مش بتبعها للعميل ده انتا بتاخد مكانها واحدة تانية فاضية او بتسبها عنده وتاخدها المرة الجاية بس الأحسن انك تاخد مكانها علشان مش كل شوية تشتريلك جمدانات وتتعطل لحد اما تجيلك تانى اتعود تاخد مكانها واحدة فاضية بتاعة كلور بتاعة سلفونيك اى جمدانة كده كده انتها هتغسلها تانى قبل اما تعبى فيها .
وهى زى اللى فى الصورة المشار إليها بسهم لونه أصفر :

 

14 –  هتجبلك برميل بلاستيك اللى بيسع 60 لتر بس لو انتا شغال لوحدك هيبقى مش سلسل فى تحركه معاك لما تملاه بمحلول الصودا فخليك أحسن فى شراء برميلين بلاستيك الى بيسع 30 لتر أو أزيد شوية علشان هنعوذهم ندوب فيهم الصودا والواحد عامل 20 جنيه دول هيبقوا سهلين فى شيلهم وتحركهم وعامة ده يرجعك لراحتك فى شغلك واذا كنت هتضرب الفنيك لوحدك ولا هيبقى معاك حد بس انا بسهلك الأمر علشان لو جيت فى يوم وضربت الفنيك لوحدك

 

15 –  هتشتريلك غلاية صاج بتسع 20 لتر وأزيد شوية بمعنى انك مثلا عاوز تزود فى النسب او تقلل او تغير فيها اللى هى نسب المواد الخام للفنيك فبدل ما تشتغل وتجرب فى البرميل الكبير اللى بيسع 200 كيلو لأ هتفيدك الغلاية فى انك تعمل تجارب بسيطة تضريبة 20 لتر مثلا وكانها برميل مصغر طبعا انا ان شاء الله هديلك نسب تمشى عليها بعد كذا تجربة توصلت اليها وهديلك برده شوية نسب للتجارب نفسها

 

16 –  بتجبلك كام شفشق بلاستيك علشان هتصب بيه محلول الصودا المخفف وبنشوف بيه شفافية الفنيك له كذا إستخدام معانا والشفاشق اللى انا أقصدها شفاشق عادية خالص زى اللى بتستخدم فى اى بيت زى اللى فى الصور
أما لو حبيت إنتا تجيب شفاشق عليها تدريج بالملليتر ماشى خير وبركة ده أحسن ليك فى ضبط مقاديرك بالملليتر ده أفضل وأحسن لإنى سمعت إن فيه شفاشق بلاستيك بيبقى عليها تدريج لحد 1000 ملليتر أهم حاجة متجبهاش ازاز علشان بتبقى غالية ومش عملية واحنا استخدامات الشفاشق عندنا محدود فقط بنصب بيها محلول الصودا الكاوية المخفف أو بنشوف بيها شفافية الفنيك حاجات زى كده

 

17 – طبعا الفنيك أثناء تصنيعه بيحتاج دائما للتقليب يبقى إذا :
يإما هنقلب
يدوى بخشبة طويلة أو إننا هنقلب بماتور
هنتكلم أولا على أفضل حاجة للتقليب وهو التقليب عن طريق ماتور أولا مزاياه كثيرة جدا منها انك ممكن تضرب الفنيك لوحدك ومتحتاجشى لحد يساعدك ومنها أيضا الماتور شغال على طول مبيبطلش طول ما انتا بتصنع ودية ميزة كويسة لتمازج واندماج المكونات مع بعضها وسرعة تفاعلها + ان انتا ممكن تسيبه يقلب ساعة ساعتين خاصة أثناء الحقن بالصودا فى أواخر التضريبة زى ما هنبقى نتكلم عنها ودية ميزة كويسة تخلى الفنيك سماره يزيد ولمعانه وشفافيته كمان تزيد

 

رقم (1) ماتور
رقم (2) عمود موصل الدروبكس بالماتور
رقم (3) الدروبكس
رقم (4) حامل شايل الماتور والدروبكس متمسمرين فيه
رقم (5) يد علشان تشيل بيها الماتور وتنقله من برميل لآخر
رقم (6) العمود ( الأكس اللى نازل من الدروبكس )وإن شاء الله هرفع لكم صوره منفرد علشان تشوفوا الريش المتصلة بيه ( مراوح التقليب )

 

 

ده عبارة عن ماتور واحد حصان عادى خالص ب 250 جنيه صينى تقريبا بس طبعا بيجى سرعته عالية 1200 تقريبا لفة فى الدقيقة انا مش متذكر قوى كان عدد لفاته كام فى الدقيقة بس احنا عايزينه طبعا يكون بطيىء علشان يدينا حد أقصى 100 لفة فى الدقيقة بحيث لما تحمل عليه وتحط خاماتك كلها يقل يوصل ل 90 ، 80 لفة فى الدقيقة لإنه كل أما يكون سريع يعمل دوامة فى البرميل يقوم يكب محتويات البرميل من خامات التصنيع للفنيك لبرة على الأرض
لكن كل أما تكون سرعته بطيئة كل انتا ما تقدر تديله الكميات بتاعته
طيب يبقى اذا علشان نقلل السرعة بتاعته ونوصله ل 80 لفة فى الدقيقة يبقى هنوصله بدروبكس الدروبكس تقريبا اشتريته ب 500 جنية مستعمل
طيب لو ملقتشى دروبكس يوصلك عدد اللفات فى الدقيقة ل 80 ولقيت أقل من كده يوصلك ل 60 أو 50 أو أقل المهم إنه يكون سرعته معقولة فى التقليب لإن انتا كده كده بتشتغل فى برميل فالسرعة مش مشكلة أهم حاجة يقلب كويس وميقفش منك لما تحمل عليه الخامات فى البرميل أهم حاجة يتنيه يقلب كويس يبقى معقول يعنى فى تقليبه لا سريع ولا بطىء وسط يعنى المهم انه شغال بيقلب ميقفش منك او يتقل
طيب الدروبكس ده هنوصله بعمود ( أكس ) نازل من الدروبكس وطبعا العمود ده مش ملحوم فى الدروبكس علشان تعرف تفكه منه ويبقى سهل تتنقل من برميل لبرميل والعمود بنعمله بحيث نسيب مسافة بين نهاية العمود وبين قاع البرميل علشان ميلبش فى قاع البرميل
والعمود ده بيبقى ملحوم فيه ريش للتقليب زى المروحة بعملها على 3 مستويات فى العمود واحدة هتبقى تحت ملحومة فى آخر العمود وواحدة فى نصف العمود وواحدة فوقيها بشوية وكل ريشة طبعا بتبقى بدراعين دراع على اليمين ودراع على الشمال
والريشة بتكون بميل لفوق شوية علشان لما تيجى تقلب تبص تلاقيها إيه تسحب من فوق لتحت على طول لإن لما الريشة بتكون فيها نسبة ميل بتقلل المقاومة لإنها كل اما تكون عدلة تاخد مقاومة جامدة لكن لما تكون فيها نسبة ميل تقوم تعمل دوامة بسيطة تجيب من فوق لتحت على طول ومتكبش الفنيك لبرة يعنى الميل بتاعها يكون تقريبا بتاع 65 درجة متكونشى مايلة قوى علشان متعملش دوامات عالية تقوم تكب لبرة
وطبعا علشان تعمل الشغل ده على مقاس البرميل لازم هتاخد معاك برميل فاضى للصنايعى اللى هيعملك الشغل ده علشان يقيس عليه وتحاول لما تشترى البراميل تجبها كلها شكل واحد وطول واحد وقطرواحد كلها مقاس واحد يعنى علشان تعرف تنقل الماتور من برميل لآخر
عامة الشغل ده كله كلفنى هنقول ماتور ب 250 جنيه ، ودروبكس مستعمل من عند الصنايعى ب 500 جنيه بس بصراحة مع انه مستعمل بس زى الصاروخ الراجل فعلا خدمنى فيه جامد وهنقول العمود والحامل والتركيب الشغل اللى هيعملهولك الصنايعى هياخد فيه 250 جنيه كمان يبقى قول هيقفل ال 1000 جنيه بس حاجة بصراحة هتريحك فى شغلك جامد مش خسارة فيها ال 1000 جنيه

 

18 – طبعا لما نيجى نعبى الفنيك السوبر فى ازايز السوبر قدامك ماكنتين تشتغل عليهم علشان تقفل غطاء ازازة السوبر زى تقفيل العاشر الغطاء المعدنى الذهبى مقاس 28 يا إما نقفل بماكينة يدوى او نقفله بماكينة أتوماتيك
هنتكلم على الأتوماتيك الأول :
هى ماكينة لها ماتورين وتعمل اوتوماتيكيا لتقفيل الغطاء على رقبة الإزازة حيث انها بتقلوظ الغطاء على رقبة الإزازة القلاووظ وتقفل دبلة الغطاء على حافة الإزازة حنى تكون محكمة مثل غطاء ازازة اى علبة دواء
وطبعا انا مش هتكلم عليها كتير لإنك لو عملتها هى بتتعمل عمولة كده كده لازم المهندس اللى هيعملهالك هيدربك عليها فهتكون فى غنى عن شرحى لإنها عايزة شرح عملى وليس نظرى
فيه إثنين أعرفهم فى القاهرة بيعملوا الماكينة دية
وفيه الماكينة اليدوى :
عبارة عن ماكنتين واحدة تقلوظ الغطاء والثانية تقفل دبلة الغطاء على الإزازة بس عيبها انها بطيئة شوية وعايزة ايديك تكون سريعة عليها علشان تنجز وفى نفس الوقت ايدك تكون حساسة عليها علشان متدبحش الغطاء من الجناب ( يعنى عايزة تعود شوية )
بس جميلة انا اشتغلت عليها فى الأول اول ما فتحت وقعدت سنتين اشتغل عليها ومدبحتش معاية غطيان لإن ايدى خدت عليها وكنت شغال سريع جدا عليها هى مسألة تعود
بس بعد اما جبت الأتوماتيك حسيت بإنجاز رهيب فى الوقت وراحة لإيدى
وهى بتتعمل برده عمولة عند الورش السابق ذكرها فى الكلام على الماكينة الأتوماتيك
وهما ماكنتين بيتعملوا مع بعض واحدة بتقلوظ الغطاء والتانية بتكبس الغطاء ( بتقفل دبلة الغطاء )
وكانوا متكلفين الأتنين 450 جنية

 

 19- هنتكلم دلوقتى على الغطيان والإزاز

أولا : الغطيان
1_ غطاء ازازة السوبر وهو الغطاء المعدنى الذهبى مقاس 28 اللى هنغطى بيه الإزازة السوبر وهنستخدم فى تغطيته لإزازة السوبر الماكينة الأتوماتيك أو اليدوى اللى ذكرناها قبل ذلك وطريقة التغطية سواء باليدوى او السوبر المهندسين اللى فى الورش الصناعية اللى ذكرتها لك قبل كده هيعرفوك بالتفصيل كيفية استخدام الماكينة اليدوى او الأتوماتيك وكل شىء عنها بالتفصيل لإن ذلك يحتاج إلى العملى وليس النظرى فاتصل بيهم واتفق معاهم واذهب اليهم وشوف بنفسك الطريقة العملية لتغطية الإزازة السوبر بالغطاء المعدن الذهبى مقاس 28
وهذا الغطاء بيركب على ازازة السوبر الكبيرة سعة النصف لتر وبيركب على الإزازة السوبر الصغيرة سعة الربع لتر وهو بيتباع بالكرتونة كرتونته فيها 4500 غطاء ب 390 جنية أو كرتونة فيها 5000 غطاء ب 425 جنية
وأماكن وجوده فى كذا محل هأذكر منها على سبيل الإجمال وليس حصر كل اللى بيبعوا الغطاء ده لأنك هتلاقى كتير فى المكان اللى هأقولك عليه محلات كتير

 

وعامة كل شارع الجامع الأحمر الأغلبية فيه بتوع غطيان وانا ذكرت المحلات السابقة لإنى مش معاية كروت لكل المحلات هناك لإنى مش محتاج كروت انا بنزل الف على كل المحلات اللى هناك لإنى كده كده بنزل اتابع الأسعار بنفسى اهم حاجة تاخد معاك ازازة سوبر كبير وازازة سوبر صغير علشان تشوف الغطاء بيركب عليها ولا لأ وتتأكد إنه مش واسع على الإزازة وإنه مقاسها بالضبط واهم حاجة تتأكد انه مقاس 28 لإن هو ده المقاس اللى بيجى على قد الإزازة بالضبط
2_غطاء ازازة الشعبى
وهو الغطاء البلاستيك الأصفر اللى عليه من فوق علامة 11 اللى هنغطى بيه ازازة الشعبى وده بيدخل فى الإزازة ضغط عادى بالإيد أو بتشتريله مطرقة كاويتش ب 5 جنيه زى ما هوريهالك فى الصورة
وهذا الغطاء بيركب على ازازة الشعبى الكبيرة سعة النصف لتر وبيركب على الإزازة الشعبى الصغيرة سعة التلت لتر وهو بيتباع بالألف سايب الألف ب 40 جنيه

 

20 –  هنتكلم دلوقتى على الإزاز
أولا : إزازة السوبر :
وهى الإزازة اللى هنعبى فيها الفنيك السوبر المركز وتسمى عند بتوع الإزاز ( مانتا ) وفيه منها برقبة قلووظ ورقبة عادية كبس الرقبة القلووظ علشان نركب عليها الغطاء المعدنى الذهبى مقاس 28 اللى هنغطى بيه الإزازة السوبر وهنستخدم فى تغطيته لإزازة السوبر الماكينة الأتوماتيك أو اليدوى اللى ذكرناها قبل ذلك
ودية فى الشكل أفضل
أما الرقبة العادية الكبس دية لو عايز تركب عليها الغطاء الأصفر البلاستيك أبو علامة 11 اللى بنغطى بيه ازازة الشعبى وده بيدخل فى الإزازة ضغط عادى بالإيد أو بالمطرقة الكاوتش

 

وفيه من ازايز السوبر ( المانتا المقلوظ أو العادية الكبس ) سواء المانتا الكبير او المانتا الصغير فيه منها مستعمل بيبقى الإزازة بعد اما اتعبت واستعملت بيخدوها بتوع الإزاز المستعمل ويغسلوها تانى ويعبوها فى شكاير تانى
ويبعوها بسعر رخيص و فيه منها جديد عند مصانع الجديد

 
بس لو عايز نصيحتى انا بعمل الأتى بروح أربط مع بتاع المستعمل قبل اما اشترى منه بيومين واقوله عبيلى شكاير مانتا كبير ومانتا صغير مقلوظ على قد ما تقدر وتخلى باللك انه يعبى الشكاير كلها مقلوظ علشان ميحطلكش منده على ده يعنى من المقلوظ على العادى تأكد عليه لو هتشتغل على المقلوظ يبقى كل الشكاير تأكد عليه انها مقلوظ ولو هتشتغل فى العادية يبقى كل الشكاير تأكد عليه انها مانتا عادية كبس وبرده تأكد عليه انها تكون كلها شكل واحد لأن فيه من الأزايز فى السوق المانتا بتبقى محفور عليها كلمة فنيك الخليج ومختلفة فى الشكل شوية عن باقى الإزاز المانتا الى فى السوق فتأكد عليه انه ميحطلكش منها فى وسط الشكاير علشان ميتعملكش مشاكل فى السوق لأنها واضحة قوى لإن دية بتاعة واحد صاحب مصنع فنيك فى القاهرة وعامل اسم الفنيك بتاعه اسطنبة على الإزاز علشان محدش يعرف يعبى فى ازازته وبرده تتأكد ان الإزاز كله سليم من عند البوزة بتاعته البوزة بتاعة الرقبة يعنى ميبقاش مشطوف من البوزة يعنى ميبقاش مكسور او مفلق من البوزة علشان ميسربش الفنيك من الغطاء لما تغطيه بالغطاء
طيب انا بعمل ايه انا بجيب كميات كبيرة مستعمل بس كلها ماية واحدة ومغسولة كويس بتبقى فى النهاية زيها زى الجديدة وبسعر ارخص بكتير وبعدين بعد كده اروح اجيب جديد لإن برده المستعمل مبيبقاش متوفر على طول او بياخدوا وقت عبال اما يوفرولك يعنى ممكن اسبوع او اتنين انما الجديد موجود كل يوم وبالكميات اللى انتا عايزها فانتا ممكن تتعامل مع دول ومع دول وده

 

21 – بالنسبة للإستيكر اللى هنلصقه على إزازة السوبر وإزازة الشعبى
طبعا ده هيرجع ليك انتا وما تفضله من خامات للإستيكر وتكلفته ومقاسه على الإزازة كل هذا بيختلف من شخص إلى أخر حسب ما تفضل وما ستكلف ولكنى سأعطى لك نموذج عن إستيكرات لشركات لناس أصدقائى ساهمت معهم فى تصميم وشكل الإستيكر
بالنسبة لإستيكر السوبر :
أنا عملته مقاسه 5 سم فى 9 سم واديتله طبقة يو فى عليه علشان يلمع والتصميم والتعديل مجانا كل مرة تطبع فيها أى كمية انتا عايزها على الشركة نفسها لإنها شركة تصميم وطباعة
وعموما انا بعمل الألف عندهم حتى لو هعدل أو هغير فى التصميم كل مرة لإن التصميم مجانا زى ما قلتلك بطبع الألف عندهم ب 29 جنية واستيكر السوبر الكبير انا بعمله زى استيكر السوبر الصغير نفس المقاس ونفس الشكل ولكن التعديل بيبقى فى كتابة حجم العبوة والسعر



 

تعليقان 2 »

أكتب تعليقك الأن !

أضف تعليقك أدناه ، أو تنبية من موقعك. يمكنك أيضا الاشتراك في هذه التعليقات عبر RSS.

نرجو أستخدام التعليقات بما يفيد ,, وعدم أستخدام بريد السبام ,..

يمكنك استخدام هذه العلامات :
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

هذا هو تمكين Gravatar مدونة. للحصول علىية بنفسك المعترف بها عالميا! ، يرجى تسجيل في Gravatar.